嘻哈热门音乐交流组

#Day1 苦行僧

跟住机智叔听歌仔2018-12-02 09:49:59


我觉得需要一啲引言

开公众号其实係写俾自己同一啲无聊嘅朋友仔睇嘅

咁呢 因为我份工 的确係稍微无聊咗少少

例如我攞咗两个月人工都未开始做嘢

希望冇同事见到

咁跟住呢 我又係一个好多嘢讲嘅人喔

又係一个好中意听歌仔嘅人喔

日日发咁多朋友圈都唔係办法

所以 我决定 当哩度日记簿又好 树洞又好

留低翻啲文字 留低翻啲记忆

唔係嘅话凭我嘅记忆力 真係好快就咩都唔记得哈哈哈哈嗝


讲翻正题,今日真係好鬼冻,冻到个头有啲大。

其实从琴日开始就开始谂,边首歌有幸做我第一篇推送。毕竟我係一个念旧嘅人,我甚至揾翻旧歌单出嚟听,听咗好耐好耐,拣咗好耐好耐,最后都係拣咗立立。

事实上我并唔係太早留意佢,中意佢嘅原因都係因为一位旧友,一位我好重视嘅曾经嘅好朋友。高中有一段时间同佢玩得好好,嗰段时间我就跟住佢中意咗洪卓立啦,许廷铿啦,糖兄妹啦,狄易达啦等等等等。

好奇妙嘅一段友谊,我甚至有错觉觉得我可以同佢一生一世,到后尾先知道,无论係友情定爱情,你越觉得可以一生一世嘅感情呢,係越容易突然间失去嘅。发生咗一啲事,基本上就冇再联系过了。我谂如果我当时再成熟少少,结果可能唔会係咁。今日亦都好想再同佢做翻朋友。

讲翻立立,好可爱嘅一位歌手,留意咗佢咁多年,一直唔咸唔淡,得闲晒下靓靓女朋友,得闲微博直播打下机,做下旅游节目,仲有时间剩就出下歌咁。

苦行僧收录于立立嘅第一张专辑《爱·无胆》里面,作曲伍仲衡,填词郭薾多,有两个版本,day mix轻快少少,night mix慢啲悲啲,留意翻啲歌词啦,同埋立立当年整体形象啦(唔肥嗰阵咯),就可能day mix係凑数嘅。旋律我喜啊,所以当年第一次听就喜欢到依家。

就,差唔多了,好听,去听啦。